NBA: Ажил хаялт зарлагдлаа

Мэдээ, Мэдээлэл - Спорт | Оруулсан: Өнөө | 2011.08.16 16:27 |

Өчигдөр орон нутгийн цагаар 12:01 минутаас эхлэн Хойд Америкийн мэргэжлийн лигүүдээс хамгийн алдартай хамгийн нэр хүндтэй хамгийн олон үзэгчтэй нь болох НБА-д ажил хаялт албан ёсоор зарлагдлаа. Энэхүү шийдвэр нь тоглогчдын холбоо болон лигийн удирдлагуудын хийсэн 3 цагийн уулзалт амжилтгүй болсны дараа гарсан бөгөөд шинэ хөдөлмөрийн гэрээнд 2 тал тохиролцон гарын үсэг зуртал үргэлжлэх билээ. Лигийн бүх үйл ажиллагаа албан ёсоор зогсоод байгаа бөгөөд Лас Вегаст болох учиртай байсан Зуны лиг цуцлагдаж, улирлын өмнө Европт явагдахаар төлөвлөгдөж байсан аялал мөн явагдахгүй нь тодорхой болж байна. Өнөөдөр эхлэх байсан чөлөөт агентийн солилцооны үе ч мөн адил эхэлсэнгүй. Хамгийн сүүлийн локоут 1998-99 оны улиралд явагдсан бөгөөд үүний улмаас лиг хугацаанаасаа хоцорч эхлэн ердөө 50 тоглолттойгоор зохиогдож байсан. Тоглогчдын холбооны тэргүүн Билли Хантер болон НБА-ийн комиссар Дэвид Стерн нарын хэлснээр 2 тал тохиролцоход нэлээн хол байгаа бололтой. Багийн эзэд жил бүр 750 сая долларыг зөвхөн тоглогчдын гэрээнээс шалтгаалж алдаж байгаа бөгөөд 22 баг алдагдалтай ажиллаж байгаа тул энэ гэрээг өөрчлөхийг хүсч байгаа. Гэтэл тоглогчид лигийн дундаж цалинг гэрээний 6 дахь жилд 7 сая доллар болгон өсгөхийг хүсч байгаа ажээ. Дашрамд сануулахад өөр нэг мэргэжлийн лиг Америк хөлбөмбөгийн NFL дэх ажил хаялт 3-р сараас эхэлсэн бөгөөд одоог хүртэл талууд тохиролцоонд хүрээгүй л байгаа билээ.