“Майами Хит” бэлэн (Дэлгэрэнгүй)

Энэ зун NBA сонирхогчдын анхаарлын төвд зүй ёсоор ороод байгаа “Майами Хит” баг улирлын өмнөх тоглолтоо хийхэд бэлэн болоод байна. Тэдний олны анхааралд орох шалтгаан нь мэдээж шинэ цагийн их гурвал билээ. NBA-ын зарим багууд тив алгасан улирлын өмнөх тоглолтоо хийж байгаа бол нарлаг Майамигийнхан улсдаа байх юм. Тэд улирлын өмнөх эхний тоглолтоо дорнод бүсийн сулхан багуудын нэг “Детройт Пистонс” багийн эсрэг өөрийн талбайд хийнэ. Энэ тоглолтын талаар багийн шинэ гишүүн Леброн Жеймс “Бид бэлэн байна. Бидний талаар хүн бүр дэндүү их ярилаа. Тиймээс бид талбайд гарч, тэр олон асуултын тань хариултыг өгөх болно” гэсэн байна.

Багийн хувьд тоглолтод ороход бэлэн 19 тоглогч байгаа бөгөөд улирал эхлэхээс өмнө, улирлын өмнөх тоглолтуудыг үндэслэн багийн дасгалжуулагчийн алба зарим тоглогчдыг талбайн гадна үлдээх биз ээ. “Хит”-ийн улирлын өмнөх эхний тоглолтын тасалбар аль хэдийнэ зарагдаж дууссан бөгөөд онлайн худалдаагаар 250 ам.доллараас илүү үнэтэйгээр зарагджээ. Дуулиан шуугианаар дүүрэн, сэтгэл догдлуулсан, суудлаас өндөлзүүлсэн олон сайхан мөчийг бүтэн улирлын турш Боловсрол ТВ болон Score студитэй үргэлж хамт байн хүлээн авч үзээрэй.